SAKAWRDAI TLUONGLAM HMAR STUDENTS’ ASSOCIATION GENERAL ASSEMBLY

Tuiruong tienga inthawka fe ding hai chun Ruonglevaisuo (Tipaimuk) Kai thlang met ah Sakawrdai/ Vaitin kai (Zilthawsuo) ah kai ding a niha. Zilthawsuo inthawk hin Motor in Sakawrdai fe thei a nih. Motor hi Sakawrdai ah inchalawk a ngai. Motor hmang man chu inbiekdan a zirin – Light Vehicle Rs 2000/- vel, Meadium Vehicle – Rs 3000/- vel. Zilthawsuo a hin Thingpui dawr a um (Ph No -0985632599). Zilthawsuo le Sakawrdai inkar a hin Vaitin khuo a uma Darkar 2 vel Motor a tlan in Sakawrdai tlung thei a nih. Km 15 vel cho a niha chu a lam a tha tawk naw leiin tlan hun hi a sawt met a nih.

Churachandpur inthawka Tipaimuk Road ah Motora fe ding chun, Sipuikawn (Hmarkhawpui) inthawkin Tuivai kan in Mizoram khuo New Vervek (Khankawn an ti hlak bawk) ah lut phawt ding a nih. New Vervek inthawk hin Sakawrdai chu 6 KM vel cho a nih, lam thapangngai a ni leiin Minute 20 vel tlan cho a nih.

Silchar inthawka Aizawl tienga feding chun, Mizoram khuo hmasatak Vairengte Moizoram Police Check Gate phakhma (Silchar tiengpang) ah Mizoram Excise Check Gate ah MLTP (Mizoram Liquor Total Prohibition) dan hmanga inruithei thil khap hai uluk taka an checkna paltlang phawt ding a nia. Hi MLTP Check Gate a hin Body check chen khawm an thaw hlak leiin mitin fimkhur a ngai takzet. Fak le dawn mei mei leia muolphon thei a nih. MLTP Check Gate bak hi chu enghel ding taluo a um nawh. Vairengte lut charin Vairengte a hin HSA Unit pathum umna Join H.S.A Vairengte hai an um ti kha theinghil lo ding.

Vairengte inthawk hin Aizawl panin fe pei ding. Vairengte le inzawm deuthaw hin Asia khawmuolpuia a lientaka hril Counter Insurgency Jungle Warfare Training Centre a uma, hi hmuna hin US Army chonaw khawm Khawmuolpui dang hai inthawk Sipai ralrel inchuokin an hung hlak. Chuong chun fe pei in Mizoram Kuva chiengna hmunpui Bilkhawthlir i tlung ding a nih. Bilkhawthlir inthawk hin khawsak tieng thlirin Sakawrdai Tlangdung i thlir thei el cho ni lovin Mizoram Tuikhuop lientak Serlui B Hydel Project hmu thei bawk i tih. Chuongchun, Kolasib Town i lut hman Hmar Autonomous District dinga ei Demand Area (tua SHDC’n a huom lo chin) Rengtekawn lut i ta, kawnzam vawitieng HMAR PASALTHA LUNG (Martyrs Lungphun) lo um hmu thei i tih. Hi kawn hi Mizoram le ei ramri dinga Hmarnau han ei beisei chu a nih. Kolasib Town i lut zawm nghal pei ding a nitah. Kolasib hi Dist Capital a nia, Hmar tawng hmang talo hai tiemsa vawng chun Hmar khuoa hrilve thei a nih. H.S.A Jt Hqrs Kolasib hai chettlatna a nih. An Bazar hmun Diakkawn a hin Bu fak thei a nih. Kolasib i hung khel hin Thingdawl khuo lo um a tia, hitaka hin Highway Resturant (riek theina nghal) a um bawk. H.S.A Unit khawm ei neina khuo a nih ti hrietsa ding. Thingdawl khela hin Bualpui khuo lo um nawk a tia, hi khuo kawnrek I hunglai hin tlaktieng zuk en la ‘Lung Nupa’ hmu thei i tiha, a chanchin chu a kawmi hai indawn la, hung pei el rawh. Kawnpui khuo i hung khel charin Aizawl lam pahnih a an thre (pengthuom) hmung i tiha, vawitieng hi Lungdai, Siphir, Durtlang (Iskut chiengna hmunpui) hai fethlenga Aizawl lut theina a nih. Changtieng hi chu Sairang (Kristien Missionary han Aizawl an lutna) fethlenga Aizawl lutna a nih. Sairang khuo inthawk hin Lengpui Airport khawm a hla nawh. Chuongchun Aizawl i tlungta a.

Aizawl inthawk hin zing Dar 6 a Motor suokin Sakawrdai chu sun Dar 1 velin tlung i tih. Aizawl le Sakawrdai kar a hin Khuo 13 vel a uma (khuo inhnei te te a nih) bufakna hmun chu Khawruhlian a niha, hitaka Bu fak I nuom chun – CHHUITHANGVALA HOTEL Ph No 09615163136 le RARI HOTEL Ph No 09436318771 le a dang dang a hai bu fakding hrillawk thei a nih. Khawruhlian Hotel a hai hin Hmar tawng khawm hmangla Sakawrdai le Aizawl inkar chawlna a ni tlat leiin harsatna um naw ni. Mizirama Hotel hmuna chu Hmarbai thiempawl tak an nih.

Chuongchun Chalfil tlang (Mizorama tlang insang laia inlangpha) fe khel pei i ta East Phaileng khuo i tlung pha, kawnzam inhawi deu lo um a tia hi kawn hi a nih Hmar le Lusei ramri ‘Sauitan kawn’ (Ui thata remthu an lo thlungna) an ti chu. Fe peiin Kepran, Sawleng le Darlawn khuo hai paltlang ding a nih.

Darlawn khela hin Gate pakhat hmung i ti a, hi Gate i lut char hin SHDC Area i lut a nih. SHDC khuo hmasatak Sailutar i lut hman H.P.C ramhnuoia an lut hma a, Mizorama Hmar nau han Peaceful Band ei neina hmasatakna fethleng i tih. Kha Band a i lo thangve a nilem chun hang ngaituo let i tia, Mizoram Police han Hmar tlangval hai cho ni lo, Hmar Nunghak hai khawm Chemtum hmanga an mi sat lai i hrietsuok nawk ngei ringaum. Khang hun kha chu la sietha’n Sailutar (SHDC Area khuo hmasatak) lut i tia, vawitieng lamsira ‘Sailu’ an tar chu hmu thei i tih. Hi Sailu hi an khaw hming putsan chu a nih. Chuongchun Ratu, Lungsum le New Vervek hai fethlengin Sakawrdai ngei chu i lut ding a nih. New Vervek a hin Tipaimuk Road inthawkin vawitieng panga Sakawrdai lam a penga, changtieng i fe hlau chun Tuivai paltlangin Sipuikawn (Manipur) i lut ding a ni el.

Sakawrdai i lut hman inzinmi hai Tawngtaina hmun tlung phawt i tia, Power&Electricity Dept hai hmunpui, Assam Rifle Camp le Govt Tuisualral High School hai i khel pha Sakawrdai Town (Hmar Jerusalem) an ti chu i lut tak tak an tah. Khaw tawntir inthawka 3KM velah Sakawrdai Play Ground ah Assembly hmangna ding hmun pan i tia. Hi hmuna inthawk hin i tlungin dingah an lo thak ding che a nih.
Sakawrdai hi H.S.A Unit 3 – Vengpui, Hmar Veng le Sim Veng an uma. In No – 500 chuongmet a niha. Village Council Member (elected) 5 + Secretary le Tlangau 1 an um bawk.

Veng/kawtthler hming hran hran – Dawrveng, Melkawn, Fieldveng, Zaionveng, Ralsunveng, Pielralveng, Thailand, CASA Road, Tipaimuk Road, Kolasib Road, Sarawnveng, etc a um.

Sorkar Office chu – Sinlung Hills Development Council, SDO (Civil), Community Health Centre, SDO (PWD), SDPO (Police), Police Station, Assam Rifle, Central Intelligent Dept , PHE (JE), P&E Dept (Sub Station), etc.

Inchukna hmun – Higher Secondary School, Govt High School, Govt Middle School – 2, Primary School – 3 , Anganwadi School – 5(?) , Privt English Medium School – 2. Kohran hran hran – 10 vel le Thawktu:- ICI – D/S, EFCI – D/S, Presbyterian – Pastor, Baptist – Pastor, Salvation Army – CO, UPC (NEI) -Pastor, UPC (Mz) – Pastor,

NGO hran hran – H.S.A – Unit 3, YMA – Branch 3, MUP Unit 3, MHIP – Unit 3, Game&Sport, Carpenters Association, Driver Union, etc. Chun Sakawrdai hi khawtlang inawpna ah Valupa neia inenkawl a nia. Sakawrdai Joint Action Committee an um bawk.

Tui hi Upper Sakawrdai tlang inthawkin Gravitation le Tuihnartam inthawkin Khawl hmanga Pump a niha. Tuikhur 13 vel a uma chu hmang tangkai a ni rak nawh. LPG hmang an tam ta a chu, thing le Ruo hmanga thlaisuong khawm an la tam vieu. Local Cable Lalhlupuii Cable Network (LCN) a um bawk. Mobile Phone Tower – NITEL (Aircel, BSNL) le Airtel a um bawk.

Hmar Lal tlawmlo – Raja Sangliana lalna khuo a niha. A khuo sevel ramri, North – N Tinghmun. East – Sartuinek, Vaitin, Khawpuar. South – Vervek, Ratu, Buallawn. West – Khawdungsei, Zohmun. Hung phawt el rawh. HMAR JERUSALEM A HIN.